Schnitzelbänke der Schnodersieche und der Anonymen Fasnächtler Sarmenstorf

Sie sind jedes Jahr ein Highlight: die Schnitzelbänke, in denen mit einem Augenzwinkern das Dorfgeschehen der letzten Monate nochmals aufgearbeitet wird. Hier ein paar Auszüge:

Schnodersieche
Vor guet eme Johr send all Beize zue, dasch gopfertori e Kataschtrophe! Ond d Beizer, die arme Sieche, chönd vor luuter Sorge nömm guet schlofe. Nor de CEO vo eusem Volg tued sech heimlech is Füüschtli lache. Öbs seicht oder schneit, s esch schissegal, s verchaufte Bier föllt sini Kasse.

S Echo vom Lindeberg tued konzertiere ond z Bosmel i de Chile singe. Doch plötzli tued de Meier Joe flochtartig osem Tempel springe. D Yvonne Köchli tued ehm brichte: «Vor miner Tör stod e verstörte Hond.» De Joe meint, si Köter tued frömdi Hüser bsueche, well de us Rumänie chond.

SJennys näbem Pfarrhuus ond ehre Gartehag esch bigoscht es leidigs Thema. Chuum stönd Pföschte weder nach em erschte Crash, chonts scho weder zu somene Drama. S weiss niemer so gnau, was doo passiert esch, aber mer händ öppis ghört monkle. Sig schients eine echli z schnell met eme selbrige Traktor, aber pssst! Dasch alls passiert im Donkle ...

Äntli dörfid eusi Torner ehri Show weder live zom Beschte geh. En super Obig, wo erscht am früehne Morge i de Bar tued es Endi neh. Statt is Näscht hed de gross Kühni bim Ufrume met em Stapler pressiert. Z gäch i Korve ond d Ladig verlore, scho esch im Meier si Charre demoliert.

Anonyme Fasnächtler Sarmenstorf

Do dued oisi Bruscht aschwelle, de FC isch Erschte i de Tabelle. Die Vorrundi, die dued passe, die sind bald besser im Tschutte als im Jasse.

Mit em neue Wirt im «Pöschtli» gits au wieder es neus Möschtli. Fertig mit Quöllfrisch us Appezell, jetzt heissts weder «Feldschlössli hell».

Und was Feldschlössli zahlt hed für das Konzept, esch es Gheimnis wie im Appezellerchäs sis Rezept.

Chuum sind d Maske und s Zertifikat verbii, ladet Zunft zur Fasnacht ii. Zum Fäschte sind d Heuröpfler gar ned z fuul, aber en Flyer mit acht Fehler – wo sind die i dSchuel?

De alti Papscht seit mit Bedacht, er heigi en Falschussag gmacht. Die Wortwahl esch e chli verzoge, richtig heisst das: Er het gloge.

Oise Gmeindrot isch cholegeil, selbst es Grundwasserwerk isch ehm feil. Die Churzsichtigkeit dued ois stinke, müend oisi Chind einisch Papiergeld oder Bitcoins trinke?

D Gmeind bauet und flickt Brugge, und d Stüürzahler dörfit tugge. Mer bruchid aber nid nur Brugge für dBuure, es brucht au e Brugg zwüsche de Tolerante und de Sture.

Neu, und för d Unterhaltig s Bescht, Big Brother us em Storchenäscht. Aber Achtung, ehr Voyeure, ab sofort sends do, oisi Akteure. --zg